Ե՞րբ է անհրաժեշտ սկսել սեռական կյանքով ապրել

Ե՞րբ է ավելի լավ, այսինքն՝ ավելի ճիշտ սկսել ապրել սեռական կյանքով: Չնայած, ընդհանուր առմամբ, հայուհիները պահպանել են միայն ամուսնության առաջին գիշերը կուսուցությունից զրկվելու ավանդույթը, բացառություններ, ամեն դեպքում, կան: Եվ ավելի ու ավելի հաճախ: Վիճակագրության համաձայն, յուրաքանչյուր 3 հարսնացուն արդեն կույս չէ, այն դեպքում, երբ 10 տարի առաջ յուրաքանչուր 5-րդն էր: Այդ պատճառով NEWS.am STYLE-ը խորհրդի համար դիմեց մասնագետի. կա՞, արդյոք, որոշակի տարիք, որն ամենից հարմարն է սեռական մերձեցման համար: Այդ մասին կպատմի սեքսոպաթոլոգ Վարդուհի Ալավերդյանը:

«Ամեն տարի բժշկությունն ավելի մեծ թվով անչափահասների է հայտնաբերում, ովքեր ապրում են սեռական կյանքով: Վիճակագրության համաձայն, աղջիկների 60 տոկոսն իր սեռական դեբյուտը բացատրում է սիրով կամ սիրահարվածությամբ, իսկ 17 տոկոսը դեպի «հասուն կյանք» առաջին քայլն անում է պարզապես հետաքրքրությունից դրդված:

Եղել են դեպքեր, երբ լավ, տնային աղջիկները սկսել են անկանոն սեռական կյանք վարել միայն այն պատճառով, որպեսզի հասակակիցների շրջանում չդիտվեն որպես «սպիտակ ագռավ», հետ չմնան մյուսներից եւ, առիթի դեպքում, պարծենան «հարուստ փորձով»: Լինում են այնպիսի աղջիկներ, ովքեր ասում են, թե վաղ սեռական կյանք սկսելուն իրենց դրդում է առանց զույգի կամ ամուսնու մնալու վախը: Եվ դա ասում են 16 տարեկան աղջիկներ… Իսկ, ի միջի այլոց, նման պատանի էակների ֆիզիոլոգիան դեռեւս ամբողջությամբ հասուն չէ, եւ նրանք սեռական ակտից հաճույք, որպես կանոն, չեն զգում:

Գինեկոլոգները կանանց խորհուրդ են տալիս սեռական կյանք սկսել 25 տարեկանից ոչ ուշ: Լավագույն տարիքը 18-20-ն է: Հակառակ դեպքում ձեր՝ արդեն լիովին հասունացած, բայց հարկադիր պարապուրդի դատապարտված վերարտադրողական համակարգը կարող է շեղումներ արձանագրել. գինեկոլոգիական հիվանդությունները տհաճ երեւույթ են: Իսկ սեռական անբավարարությունն արգանդի ֆիբրոմիոմայի եւ կաթնագեղձերի տարատեսակ պաթոլոգիաների զարգացման ուղիղ ճանապարհն է: Ի դեպ, վերջնաժամկետ, երբ կնոջն անհրաժեշտ է «ձեռք քաշել» սեքսից, գոյություն չունի: Ինչպես եւ գոյություն չունի «նորմայի» հստակ սահմանում. եթե կինն առողջ է, ապա սեքսը նրա համար չի կարող չափազանց շատ լինել»:

Հարցեր, պատասխաններ, մեկնաբանություններ